عنى يمكن الفنان محمد رشدى لما كان بيغنى ” ما تبطل تمشى بحنيه ليقوم زلزال ” مكنشى يعرف ان الموضوع اكبر من المشى بحنيه لاننا هنخش فى علوم جيولوجيه و فيزيائيه و ليله كبيرة اوى سعاتك  .


ما علينا


الزلزال هو مجرد ظاهره طبيعيه بتحصل نتيجة اهتزازات لحركة الصفائح الصخريه المتكونة منها القشرة الارضيه و دى بتنتج من مكان محدد بيبقى اسمه البؤرة و اللى بيصدر منه موجات ارتجاجيه فى الوسط المحيط للبؤرة دى .. و لو انت مفهمتش اى حاجه من التعريف دا كبر دماغك و قول الارض مشغله الفيبريشن و خلاص  .


يمكن من اهم النظريات اللى فسرت ظاهرة الزلازل دى هى ان الارض فى الاول كانت جسم ملتهب و مع الوقت بدأت تحصل برودة على سطح الجسم الملتهب دا و يتكون غلاف مائى و اللى هو المحيطات و كمان معاه غلاف هوائى .. و مع مرور الوقت اجزاء من الغلاف المائى دا بدأت تتحول للحالة الصلبه و اللى هى القشرة الارضيه او القارات اللى احنا نعرفها و اللى بتتكون من طبقات صخريه او الواح فوق بعضها .. طبعا كل التغييرات دى يدوب حصلت على الجزء الخارجى للارض بس .. لكن موصلتش للمكونات الداخليه للارض و اللى فضلت محتفظه بالحالة الملتهبه بتاعتها .. الظروف دى بتأدى لانتاج طاقه حراريه داخليه و مع الوقت الطاقه دى بتتخزن و بتوصل لدرجه لا يمكن لباطن الارض انها تتحملها فبتخرج لسطح القشرة الارضيه اما على شكل زلزال او حتى على شكل انفجار بركانى … فلما الطاقه دى بتنطلق من باطن الارض بتحاول انها تخرج من الاماكن الضعيفه او الرخوة فى القشرة الارضيه و اللى احنا بنسميها بمنطقة احزمة الزلازل لان الظاهره دى بتحصل فيها و بشكل متكرر زى احزمة المحيط الهادى و الاطلنطى و حزام شمال الصين و غيرهم و غيرهم و فيه كلام اننا اتحزمنا احنا كمان بس علماء الجيولوجيا بتوعنا نفوا دا  .

دا بالنسبة للتفسير الطبيعى .. نيجى بقى لسؤال هل ممكن الانسان نفسه يكون سبب من اسباب الزلازل ؟ .. و الله فيه نظريات طلعت و قالت ايوة .. و دا بيتم عن طريق بناء السدود و اللى بتحتجز كميات كبيرة من الميه او نتيجة اعمال التنقيب عن النفط او بناء المناجم لاستخراج الفحم او الثروات الطبيعيه .. و يمكن تفسيرهم دا نتيجة حوادث زلزاليه حصلت زى اللى حصل فى الصين سنة 2008 نتيجة وجود سد اسمه ” زيبنجبو ” و اللى نتيجة وزن الميه الموجودة وراء السد دا عمل تحريك لطبقات الارض من تحته .. و فيه كمان زلزال تانى حصل فى استراليا البعض بيفسره انه بسبب استخراج كميات كبيرة من الفحم فى المكان دا .. بس يبقى الموضوع مجرد نظريه من غير اى تأكيدات عليها .


بتتصنف الزلازل دى لتلات انواع على حسب عمق المصدر بتاعه .. زلزال ضحل ” هفأ يعنى  ” و دا بؤرته بتبقى على عمق 70 كيلو من القشرة الارضيه .. و فيه زلزال متوسط و دا من 70-300 كيلو .. و فيه زلزال عميق و دا من 300-700 كيلو .

طب الزلازل بتتقاس ازاى ؟ .. شوف يا سيدى .. الزلازل بتتقاس بشقين .. حاجه اسمها شدة الزلزال و الحاجه التانيه اسمها قوة الزلزال .. طب ايه الفرق بين الاتنين ؟ .. لو هنبتدى بشدة الزلزال فهى بتبقى مقدار الطاقه اللى بتطلع من البؤرة فى باطن الارض .. اما قوة الزلزال فبيبقى مدى التأثير و الدمار اللى بيعمله الزلزال دا فى سطح القشرة الارضيه و دى بتختلف من مكان للتانى يعنى لو فرضنا ان بؤرة الزلزال تحت القاهره مثلا فقوة الزلزال التخريبيه فيها هتبقى اعلى من قوته فى اسكندريه .. عشان كدا فيه مقياسيين اولهم اسمه “ميركالى المعدل” و دا بيقيس شدة الزلزال و بيبدء بتدريج من 1-12 اما المقياس التانى اسمه “ريختر” و دا المسئول عن قياس قوة الزلزال و بيبدء تدريجه من 1-9 .


يمكن فيه ارشادات أمنيه للتعامل مع ظاهرة الزلازل لحظة حدوثه .. انك تقف تحت مدخل باب او تستخبى تحت طاولة ولو انت سايق تبعد عن اى نفق او كوبرى و متستعملش اسانسيرات .. لكن ان جيتوا للحق انا وجهة نظرى ان كل الارشادات دى ورديه و انا رؤيتى ان وقت حدوث اى زلزال ركب الجناحات و اطلع اجرى و زى ما تيجى تيجى  .سينمائيا لو اتكلمت على الزلازل يمكن اول اسم هيخطر على بالى مخرج الكوراث رونالد ايميريش و اللى مفيش مصيبه تخطر على بال حد الا ما يجسدها فى افلامه  سواء غزو فضائى او عصر جليدى او زلازل او غيرها .. هحط فى اول كومنت مشهد من فيلم 2012 انا كنت رافعه من مدة .. و سبب رفعى ليه انه فعلا فجر كل طاقاته الابداعيه فى تصور شكل الزلزال و هو بيدمر كاليفورنيا .. اتفرج و استمتع و شوف بقى اذا كانت الارشادات الامنيه هتنفعك و لا لأ .
ادى ملخص الزلازل و اللى احنا اختذلناها فى مجرد واحدة بتمشى بحنيه راحت عامله زلزال  .

شارك الموضوع

عمرو عادل

فى الحياة الواقعيه مهندس ميكانيكا قوى اما فى الحياه الافتراضيه فباحث و كاتب و مدير الموقع دا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *