و انتهت سنة 2020 و هى تقريبا معلمة على البشريه كلها بسبب فيروس كورونا اللى اتسبب فى اضرار كبيرة جدا لكل دول العالم بلا استثناء سواء على المستوى الاقتصادى او الصحى دا غير الايام المأساويه اللى مرت علينا و احنا بنتابع بشكل يومى عداد الاصابات و الوفيات المتصاعد و بقيت الكمامه زيها زى اللباس محدش بقى بيقدر يخرج من بيته من غيرها و بقيت سنة صعبه وصلت بالناس انها تقول دى اسوء سنة مرت على التاريخ البشرى .

طيب هل هى فعلا تاخد جايزة اسوء سنة على مدار التاريخ ؟ .. سؤال بيجبرنى انى اعمل البوست دا لانك عشان تقدر تجاوب عليه لازم تكون عندك المعطيات كامله للحكم و دا مش هيحصل الا لما تعرف ايه السنيين الصعبه اللى مرت على العالم و تقدر تدخل حيز المنافسه معاها و ايه الاسباب اللى وصلت السنيين دى للمنافسه فتعالوا نستعرضهم سوا مع بعض و الحكم ليكم فى الاخر .

— سنة 530 —

العام دا يعتبر واحد من اسوء الاعوام اللى مرت فى تاريخ البشريه لأن الاراضى الاوروبيه و الشرق الاوسط و اجزاء من أسيا بقيت فى ظلام دامس طوال اليوم و لمدة 18 شهر متواصله الناس فيها مش قادرة تشوف ضوء الشمس و لا حتى ضوء النهار و دا ادى لنتايج كارثيه فى انخفاض درجات الحرارة بشكل معرفتوش البشريه قبل كدا و تلف اطنان من المحاصيل لعدم تعرضها لضوء الشمس اتسببت فى مجاعات ضخمه و كل دا كان نتيجة ثوران بركانى حصل فى ايسلندا و انتشر رماده فى كل النصف الشمالى للكرة الارضيه و اللى قلب حياة سكانها لبؤس حقيقى .

— سنة 1347 —

و دى واحدة من اسوء السنوات لانها كانت بداية انتشاء وباء ” الطاعون ” او زى ما بيتسمى ” الموت الاسود ” و اللى استمر على مدار سنتين كاملين بيحصد فى البشر فى شمال افريقيا و اوروبا و اجزاء من اسيا و ببعتبره البعض الوباء الأكثر فتكًا في تاريخ البشرية لان على حسب بعض التقديرات اتسبب فى وفيات وصلت لـ 200 مليون شخص و يعتبر العدد دا بيمثل ما بين 30 الى 60% من اجمالى سكان اوروبا .. الوباء دا نشأته كانت من الشرق الاقصى و كأن المنطقة دى هى المتعهده بنشر الاوبئة فى العالم بعد وصول 12 سفينه من عندهم لميناء “ميسينا” فى جزيرة “صقليه” الايطاليه و ذهل الناس من اللى شافوه فى السفن دى لأن بعد وصولها اكتشفوا أن معظم البحارة إما ماتوا أو بيموتوا من مرض غامض مصاحب ليه اعراض مخيفه و من هنا بدء انتشار الوباء لكل الاراضى الاوروبيه و اللى رغم ان مرض الطاعون كان سريع فى القضاء على المصابين بيه الا انه كان مؤلم جدا فى المعاناه من اعراضه اللى بتتمثل فى حمى و قيء و نزيف حاد و تورمات و طفح جلدى اللى بتكلل بالموت فى النهايه و تكدست الجثث فى كل مكان و كانت ايام صعبه جدا على كل اللى عاصروها .

— سنة 1816 —

السنة دى اتعرفت باسم ” عام بلا صيف ” لان اتكرر زى ما حصل سنة 530م و حصل ثوران بركانى سنة 1815 بس المرة دى فى جبل تامبورا باندونيسيا و اللى بيعتبر اقوى ثوران بركانى عرفه التاريخ و أدى إلى إطلاق أطنان من ثاني أكسيد الكبريت في الغلاف الجوي و شكل سحابه ضخمة اجتاحت العالم و منعت ضوء الشمس و اللى كان من نتيجته انخفاض فى درجات الحرارة العالميه و تلف فى المحاصيل و المجاعات و تغيرات مناخيه و انتشار لامراض و اوبئة زى التيفوس و كانت من الاخر سنة سودا على كل اللى عاشوها حتى البعض منهم وصفها انها نهاية العالم .

— سنة 1918 —

و تعتبر واحدة من السنوات المنيله بستين نيله لان وقتها رغم شبه انتهاء الحرب العالميه الاولى لكن خلالها حصلت معارك دمويه كتير راح ضحيتها الالاف و اول ما كل الاطراف الحرب هدتها و لحست الاسفلت و بدأت تقول يا سلام كان بداية انتشار وباء الانفلونزا الاسبانيه و اللى ربما مصدر انتشارها غير معروف لكن هى انتشرت فى توقيت واحد بالولايات المتحدة و اوروبا و اسيا نتيجة رجوع القوات اللى شاركت فى الحرب العالميه للديار و هما حاملين للفيروس و اللى بدأت تنتشر بشكل كبير جدا على هيئة موجات استمرت على مدار 3 سنيين ووصل عدد المصابين بيها لـ500 مليون شخص و مات بسببها 50 مليون و دا اضطر الدول انها تعمل اغلاق و اجبرت مواطنيها على ارتداء الكمامات زى بالظبط السيناريو اللى بيحصل دلوقتى .

— سنة 1943 —

يمكن رغم ان الحرب العالميه التانيه بدأت سنة 1939 و استمرت لست سنوات لكن تحديدا سنة 1943 هى الاصعب فى تاريخ الست العجاف اللى مر بيها العالم لانها شهدت اكثر المعارك دمويه على الجبهه الشرقيه بمعركة “ستالينجراد” و معركة “كورسك” اكبر معركة دبابات فى التاريخ و حتى على الجبهه الغربيه بغزو جزيرة صقليه و طرد الالمان من ايطاليا و طبعا دى معارك كلفت قوات الحلفاء و المحور و حتى المدنيين لملايين الضحايا بالتزامن مع الابادة الجماعيه لليهود على ايد الالمان فى معسكرات الاعتقال و حتى بعيدا عن الحرب نفسها و فى الركن البعيد الهادى و فى الهند حصلت مجاعه ادت لوفاة 3 مليون شخص بسبب ندرة تواجد الغذائيه فيها بسبب ان بريطانيا كانت بتقوم بتصدير كميات ضخمة منه على حساب سكان الهند نفسهم .

و بكدا يبقى مش فاضل معانا غير سنة 2020 و اللى مش محتاجه شرح لأن الواقع شارح نفسه ليكوا بما فيه الكفايه و بكدا انت جمعت كل السنيين الصعبه اللى مر بيها العالم و تقدر تحكم و تختار على ايهم اسوء عام مر على تاريخ البشريه من وجهة نظرك .

شارك الموضوع

عمرو عادل

فى الحياة الواقعيه مهندس ميكانيكا قوى اما فى الحياه الافتراضيه فباحث و كاتب و مدير الموقع دا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *