هذه الخطوة لرجل ما .. ما هى الا قفزة عملاقه للبشريه ” That’s one small step for man, one giant leap for mankind ” جمله مأثورة و شهيره قالها رائد الفضاء نيل ارمسترونج و هو بيحط رجليه على سطح القمر كأول بشرى فى التاريخ ينول الشرف دا .. تعالوا فى الاول نعرف اصل الموضوع من البدايه .
فى البدايه لازم نعرف ان الخطوة دى بدايتها كان برنامج الفضاء ابوللو و اللى كان عبارة عن خمس رحلات مأهوله برواد فضاء منها رحلتنا دى و هو ابوللو 11 .. انطلقت مركبة الفضاء فى رحلة فضائيه اسمها الكودى ابوللو 11 بواسطة صاروخ فضائى اسمه شتيرن .. و بتتكون المركبة و اللى اسمها كولمبيا من 3 اجزاء .. وحدة قيادة CM و دى اللى فيها رواد الفضاء التلاته بتوعنا و هى الوحدة الوحيدة اللى رجعت الارض و وحدة تانيه و هى الخدمات SM و دى المسئولة عن خدمات الرحله من اكسجين و غذاء و ميه و طاقة كهربائيه اما التالته و الاخيرة فهى وحدة قمريه اسمها ايجل LM و دى متجزئه لمرحلتين اولها و هى مرحلة الهبوط على القمر اما التانيه فهى الخروج منه بعد انتهاء المهمه .
بدأت المهمه باطلاق الصاروخ من قاعدة كينيدى للفضاء فى 16 يوليو سنة 1969 .. و بعد مراحل عمليات اطلاق الصواريخ الدافعه المتعدده اتجهت المركبة الفضائيه ناحية القمر و على متنها 3 رواد فضاء نيل ارمسترونج و ادوين الدرين و مايكل كولينز لغاية ما وصلوا لمداره .. و انفصلت الوحدة الفضائيه ايجل LM من المركبة كولومبيا و كان فيها اتنين ارمسترونج و الدرين اما كولينز ففضل فى المركبه الام فى مدار القمر و على تواصل معاهم ” مش عارف افتكرت جابر الشرقاوى و هو بيقول طريق السلامة انت يا اخويا ليه ” .. المهم .. نزلت الوحدة ايجل للقمر و اثناء نزولها اكتشفوا ان فيه مشكلة كبيرة و هى ان الحسابات اللى اقرت بمكان نزول مناسب على سطحه كانت خاطئه و معنى كدا ان الوحده هتنزل فى مكان بعيد بأميال كبيرة عن ما هو متحدد لها .. دا غير ان الكومبيوتر اللى فى الوحدة اداهم كود خطأ اثناء عملية الهبوط برقم 1202 و دا معناه ان فيه خطأ ما .. جالهم الرد من هيوستون او وكالة ناسا فى لحظتها انهم ميقلقوش و يكملوا مهمتهم عادى .. و هبطت المركبة الساعه 8 و ربع مساء يوم 20 يوليو 1969 على سطح القمر .. و فى داخل المركبه ايجل سلم الاتنين رواد على بعض على نجاح عملية الهبوط و بدأوا فى تجهيز المركبه للانطلاق للمدار و الالتحام مع كولمبيا قبل حتى ما يبدأوا مهمتهم للقمر تحسبا لاى طارئ .
يمكن ناسا طلبت من رواد الفضاء الاتنين انهم يرتاحوا شويه .. لكن ارمسترونج كان متحمس جدا و عاوز ينزل .. و بدأوا عمليه معادلة الضغط و تكييف المركبه عشان تكون ملائمه لنزول رواد الفضاء للقمر .. و خرج عم ارمسترونج و حط رجله الشمال على سطح القمر كأول انسان بشرى يعمل دا و بعدها بتلت ساعه انضم صديقه الدرين رائد الفضاء و نزل على سطح القمر كتانى بشرى يعملها .
الحدث دا كان فى بث مباشر لكل وكالات الانباء العالميه .. و بدأوا رواد الفضاء يستكشفوا القمر .. قعدوا يمشوا و يتنططوا شويه .. و حطوا لوح تزكارى على القمر لرحلتهم دى .. و طبعا حطوا العلم الامريكى .. و كمان حطوا تذكارات لرواد الفضاء اللى سبقوهم سواء امريكان او حتى سوفييت زى ججارين مثلا و بدأوا يجمعوا عينات من تربة القمر لتحليلها و بدأوا يتمشوا لمسافة 65 متر بعيد عن المركبة ايجل و دى كانت ابعد مسافه قدروا يوصلوا ليها .
الموضوع دا تقريبا اخدوا فيه ساعتين و نص على سطح القمر .. حتى جالهم اتصال من الرئيس الامريكى نيكسون مباشر و كلمهم لمدة دقيقه و هما على سطحه .. و صدرت الاوامر ليهم من هيوستون انهم يبدأوا مرحلة العودة .. و ركبوا المركبة LM ايجل و قفلوها عليهم .. لكن اكتشفوا ان زرار الاطلاق فى المركبة كان متعطل فاضطروا انهم يسوقوا الفهلوة و جابوا جزء من قلم يصلحوا بيه زرار الاطلاق و صلحوه فعلا ” واحدة ادوارد فى عسل اسود ” .. و انطلقت المركبه من القمر و التحمت بالمركبة الام كولمبيا .. و رجعوا للارض و نزلوا فى المحيط الهادى و استقبلتهم حاملة الطائرات يو اس اس هورنيت .. طبعا تم عزلهم لمدة 18 يوم فى حجر صحى تجنبا انهم يكونوا رجعوا بأمراض من القمر و لا حاجه و لما اتأكدوا انهم بخير سابوهم و تم استقبالهم استقبال الابطال مش فى الولايات المتحدة لكن فى العالم كله .
اخيرا و انا بكتب البوست دا .. افتكرت فيلم منتج سنة 1902 ابطاله طلعوا فى رحله للقمر عن طريق قذيفة مدفع .. حتى انا ساعتها قلت لنفسى الممثلين دول لو عرفوا ان الوصول للقمر لازم صواريخ و مركبات فضائيه و بدلة فضاء و مركز تحكم فى الارض و القمر بالشكل دا .. يا ترى كان احساسهم هيبقى عامل ازاى .. حقيقى بجد مش عارف .
