طبعا موقع تويتر غنى التعريف .. و يعتبر تانى اشهر شبكة تواصل اجتماعى فى العالم بعد الفيسبوك لان اغلب المشاهير موجودين فيه سواء سياسه او رياضه او فنيه و عن طريقه يقدر متابعينهم التواصل معاهم اما عن طريق معرفة اخبارهم او حتى بالكلام معاهم .. طيب ما تيجوا نعرف اصل الموقع دا و ايه حكايته و تاريخه .

شوف يا سيدى

فى سنة 2006 قعد اربع شباب مع بعض شغالين فى شركة اسمها “اوديو برودكاست” و اسمائهم “جاك دورسي” و “نوح غلاس” و “بيز ستون” و “إيفان ويليامز” .. و كان الغرض من القعدة دى انهم يفكروا فى عمل شبكة تواصل اجتماعى تربط بينهم و بين بعضهم لسهولة التواصل بين موظفين الشركة .. جاك دورسى قالهم انا عندى الحل و هو اننا نعمل شبكة للتواصل بين المجموعات عن طريق الرسايل القصيرة .. الفكرة عجبتهم و اختاروا اسم توتر Twttr و صدرت اول تويته فى تاريخ الموقع باسم جاك دورسى و اللى كان تحت التجريب وقتها فى 21 مارس 2006 و كانت ” انا بظبط موقع توتر ” .. بعدها فريق العمل حسوا ان الاسم رخم شويه و قرروا انهم يعدلوا عليه و يسموه تويتر على وزن واحد من اشهر مواقع الصور العالميه و هو فليكر .

و نزل الموقع للناس على الانترنت بشكل رسمى فى اكتوبر من نفس السنه و بدء الناس يقبلوا عليه .. دا خلى الشركة اللى هما شغالين فيها تبتدى تفكر انها تستثمر فيه الا انها بعد سنه فضت الشراكه و كان المبرر ان محدش عارف الموقع دا عبارة عن ايه .. هل هو شبكه تواصل و لا مدونه و لا ارسال رسايل قصيرة فكان الموقع يعتبر غامض و مجهول .

و فى سنة 2007 اقيم مهرجان سنوى اسمه “ساوث باى ساوث ويست” و فيه شاركت تويتر بالدعايه لنفسها .. رواد المهرجان عجبهم الموقع و فكرته و تحمسوا انهم يشتركوا فيه و يتواصلوا عن طريقه و بالفعل ارتفعت عدد التغريدات من 20 الف لـ 60 الف تغريدة فى اليوم و اللى زود شهرة الموقع اكتر ان رائد الفضاء “مايك ماسيمو” اطلق اول تغريدة من محطة الفضاء الدوليه سنة 2010 و تبعه باقى الرواد اللى بيكتبوا تغريداتهم بانتظام عن طريقه .

موقع تويتر من المواقع اللى حققت نمو خرافى فى فترة زمنيه قليله يعنى لو بصينا على الاحصائيات بتاعته هنلاقى مثلا فى مجرد تلات شهور بس فى 2007 اتعمل 400 الف تويته و فى السنه اللى بعدها زادت و بقت فى خلال تلات شهور تانيه ارتفعت التويتات لـ 100 مليون .. و مع السنيين بدء الموقع يتطور و بدل ما كنا بنحسب التويتات بالشهور بقينا بنحسبها باليوم و مع دخول سنة 2011 ارتفعت لـ 10 مليون تويته يوميه .. انتوا متخلين العدد .

تويتر كان ذكى و بدء يستغل الاحداث فى موقعه و اضاف خدمة الهاشتاج بحيث انها تسمح للمستخدمين انهم يتبادلوا الاراء عن الحدث دا و بالتالى تزيد شهرة الموقع اكتر .. و بدأت الاحصائيات تشتغل اكتر .. زى مثلا تاريخ وفاة اسطورة البوب مايكل جاكسون و اللى اتسجلت تويتات عن الحدث دا ما يعادل 100 الف تويته فى ساعه واحده .. و لا ساعة ايه خلينا بالثوانى .. الرقم القياسى لعدد التويتات اللى نزلت كان اثناء عرض فيلم تلفزيونى اسمه “قلعه فى السماء” و سجل 143 الف تويته فى الثانيه الواحدة .. انت متخيل بقول فى الثانيه .

طبعا النجاحات دى دفعت تويتر انها تدخل فى البيزنس و بالفعل طرحت اسهم ليها فى البورصه و كان تقريبا حوالى 70 مليون سهم و سعر السهم الواحد 26 دولار و من الاقبال ارتفع سهر السهم لـ 44 دولار و دا معناه ان الشركة بقت كقيمة فعليه تعادل 31 مليار دولار .. طبعا دا معناه ان مؤسسين تويتر بقوا مليارديرات .. الشركة بعد كدا مرت بمرحلة هبوط مالى و دا دفع مجلس ادارتها انها تطور الموقع اكتر بحيث انها تزود الحروف لـ 10 الاف حرف و تديك ميزة اقرأ المزيد .. يعنى تبقى زى الفيس بوك للناس اللى عاوزين لوك لوك كتير  .. و فعلا نجحت الفكرة دى و بدأت الارباح ترجع للموقع تانى .

الامريكان دول عليهم حاجات عجيبه ان جيتوا للحق .. شركة تحليل و احصائيات مسكت موقع تويتر و بدأت تطلع نتايج احصائيه غريبه عن المحتوى بتاعه .. خلصوا ان المركز الاول فى التويتات عبارة عن حاجات لوك لوك كتير مالهاش اى تلاتين لزمة و نالت 40% من المحتوى .. ييجى فى المركز التانى المحادثات بين الافراد و بين بعضها بنسبة 38% .. اما المركز التالت فمكان امور اخرى و محددوش بالظبط النوعيه دى عبارة عن ايه و احتلت 9% و اخيرا كان الرسائل المزعجه او الـ Spam و دى مثلت 8% اما باقى النسبه فأى هنتريش يعنى .

يمكن لو اتكلمنا عن اشهر التويتات على مستوى العالم نقدر نقول كانت لدكتور “صهيب اطهار” الباكستانى و اللى كان منزل تويته بيقول ان فيه حاجات غريبه بتحصل فى البيت اللى جنبه و اصوات ضرب نار و اللى اكتشفنا بعدها انها عملية تصفية اسامة بن لادن … و فيه تويتة اوباما اللى كتب فيها اربعة اعوام اخرى بعد فوزه للمرة التانيه فى انتخابات الرئاسه و اللى اعتقد اخدت اعلى ريتويت فى تاريخ تويتر برقم 800 الف ريتويته .. دا غير التويته اللى نزلت بعد اختراق حساب وكالة الاسوشتيتدبرس و اللى اتكلمت عن وقوع انفجارين داخل البيت الابيض و اصابة الرئيس اوباما .

يعنى نقدر نقول دا ملخص عن موقع تويتر و الامور الخاصه بيه و لو هتسمحولى انى اقول انطباعات سريعه كالعادة فقدر الخصها فى ملحوظتين .

– نختلف مع امريكا سياسيا لكن تكنولوجيا انا ارفع ليهم القبعه .. و دا لسبب .. اى واحد عنده فكرة تكنولوجيه انا كدوله مش هصدك و لا امنعك فى تنفيذها .. اعملها و نشوف .. لو نجحت احنا مستفيدين و لو فشلت احنا مخسرناش حاجه .. مواقع زى الفيس بوك و تويتر مؤسسيها شباب و امريكا رعتهم لان بالشركات دى بتقدر تفرض هيمنتها على العالم كله و دى حقيقه .. فهل فى يوم هنقدر نستوعب النقطة دى عندنا و نعملها ؟ .

– بعيدا عن التكنولوجيا و البيزنس بتاع تويتر بس انا بحس انه ماشى بمبدء ” خير الكلام ما قل و دل ” مجرد تويته من 140 حرف كفيله انها تقلب الدنيا .. ممكن تقوم حرب او تعمل جدل داخل مجتمع من المجتمعات .. او حتى كفيله انها تكون مانشيت صفحة اولى فى اشهر الصحف العالميه .

شارك الموضوع

عمرو عادل

فى الحياة الواقعيه مهندس ميكانيكا قوى اما فى الحياه الافتراضيه فباحث و كاتب و مدير الموقع دا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *